GAZETA REPUBLIKA » Botë / Rajon

Ushtritë izraelite-siriane shkëmbejnë zjarr

redaksia — Wed, 22 May 2013 09:45:28 +0000

Ne harte, Lartesirat e Golanit, territor i pushtuar nga Izraeli ne vitin 1967 dhe aneksuar ne 1981-shin. Trupat izraelite dhe siriane shkëmbyen zjarr në kufirin neutral midis dy shteteve, që ndan territoret e pushtuara të Golanit nga Siria. Sipas Ministrisë Izraelite të Mbrojtjes, ushtria izraelite u kundërpërgjigj, pasi një automjet u godit me një breshëri plumbash nga ana siriane e kufirit. Nga ana e tij, Damasku konfirmoi hapjen e zjarrit, por u justifikua duke thënë se ushtarët kishin qëlluar dhe shkatërruar një automjet, që kaloi kufirin neutral dhe u fut brenda territorit sirian. Marrëdhëniet midis Sirisë dhe Izraelit u përkeqësuan në mënyrë dramatike pas bombardimit të disa strukturave ushtarake në Damask, nga ana e gjuajtësve izraelitë, më parë gjatë majit. Ushtritë e të dy vendeve janë përfshirë në dyluftime në një seri incidentesh gjatë javëve të fundit. Tel Avivi është një prej mbështetësve më të mëdhenj të kryengritësve, të cilët dyshohet se i ka mbështetur edhe me armë. Izraeli pushtoi Lartësirat e Golanit gjatë luftës së vitit 1967, pasi fitoi një luftë 6-ditore të imponuar nga një koalicion vendesh arabe, midis të cilëve edhe Siria.
Këto territore u aneksuan zyrtarisht në vitin 1981, një lëvizje e panjohur nga komuniteti ndërkombëtar dhe Siria, e cila vazhdimisht ka ushtruar presion për rikthimin e këtyre territoreve.

Beograd, serbët djegin flamurin e BE-së dhe të Kosovës

redaksia — Wed, 22 May 2013 08:24:42 +0000

Simpatizantë të Partisë Radikale Serbe (SRS) kanë djegur flamurin e Bashkimit Evropian dhe atë të Kosovës, përpara ndërtesës së Presidencës së Serbisë në Beograd. Mediat beogradase thonë se radikalët serbë e kanë kryer këtë akt në shenjë proteste ndaj vizitës së ministrit gjerman të Punëve të Jashtme, Guido Westerwelle. “Ne jemi këtu që të porosisim se Serbia kurrë nuk do të heq dorë nga Kosova, pavarësisht se tani një muaj qytetarëve të Serbisë po ua pastroni trurin”, ka thënë zëvendëskryetari i SRS, Nemanja Sarovic, transmeton Indeksonline. Ai më tej ka theksuar se edhe sikur Serbia të pranojë formalisht pavarësinë e Kosovës, kjo nuk do të ndryshonte qëndrimin e “armiqve të Serbisë” –Gjermanisë, BE-së dhe SHBA-së.

Kërkohet zbatimi i marrëveshjes për Kosovën

redaksia — Wed, 22 May 2013 08:21:30 +0000

Kryeministrat e Kosovës dhe Serbisë, Hashim Thaçi dhe Ivica Daçiq takohen përsëri këtë të martë (21.05.) në Bruksel në vazhdën e përpjekjeve për normalizimin e marrëdhënieve mes dy vendeve. Kur më 19 Prill, pas gjashtë muajsh të negociatave maratonike në nivelin më të lartë politik, kryeministrat e Kosovës dhe Serbisë ranë dakord për një marrëveshje për normalizimin e marrëdhënieve, Hashim Thaçi njoftoi se deri më 26 prill do të duhej të vijë edhe deri te “Plani për zbatimin e marrëveshjes”, i cili sipas fjalëve të tij shënon fillimin e një epoke të re bashkëpunimi ndërshtetëror. Megjithatë, ai fillim siç duket nuk do të jetë as i shpejtë dhe as i lehtë. Grupet e punës nga Beogradi dhe Prishtina nuk ishin në gjendje të bien dakord mbi një plan të përbashkët të pranueshëm për të dyja palët për zbatimin e marrëveshjes. Gjatë tërë kohës ato akuzuan njëra-tjetrën për ndryshim ose futje të elementeve të reja që nuk janë pjesë e marrëveshjes. Bashkimi Evropian i cili këmbëngul gjatë gjithë kohës që “nga pjesa e shkruar të kalohet në vepra”, edhe njëherë sipas Maja Kocijancic, zëdhënëses së shefes së diplomacisë së BE-së, “në interes” të të dyja palëve ka ftuar në Bruksel kryeministrat Thaçi e Daçiq:
“Ju e dini se zbatimi është absolutisht thelbësor dhe puna jonë vazhdon në këtë drejtim. Është e vërtetë se palët ende nuk janë dakorduar mbi planin për zbatimin e marrëveshjes. Ne jemi ende duke punuar për këtë dhe ne besojmë se marrëveshja dhe zbatimi i saj janë në interes të Serbisë dhe Kosovës “. Ndërkohë që analistët thonë se të gjitha pikat e marrëveshjes më shumë ose më pak janë sfiduese, grupet e punës kryeministrave ndër të tjera u kanë lënë të hapur çështjen e “radhës së detyrave” të Serbisë dhe Kosovës në procesin e bartjes së përgjegjësive, përkatësisht heqjen e strukturave paralele dhe krijimin e bashkësisë së komunave serbe. Derisa Beogradi insiston se ky duhet të jetë ” një veprim i sinkronizuar”, Prishtina, për fillim dëshiron heqjen e strukturave paralele në veri. Edhe në rastet kur pala e Prishtinës konfirmon se “ka marrëveshje mbi zbatimin”, siç është çështja e zgjedhjeve lokale në komunat me shumicë serbe në Kosovë, fakt është se vetë serbët e Kosovës nuk kanë rënë ende dakord për të marrë pjesë në zbatimin e marrëveshjes. Sidoqoftë në qarqe diplomatike në Bruksel mund të dëgjohet se edhe plani i zbatimit duhet të nënshkruhet nga të dy kryeministrat. Ndërsa zyrtarisht mësohet se asnjë plan dhe marrëveshje nuk do të thotë asgjë për shtetet anëtare, pa hapa konkrete në terren.

Shkrimtari francez vetvritet në Notre Dame: Mos lejoni martesën e gay-ve!

redaksia — Tue, 21 May 2013 19:51:53 +0000

Shkrimtari dhe historian i njohur francez, 78 vjeçari Dominique Venner, autor i dhjetrave veprave dhe ideve pranë të djathtës ekstreme u vetvra pak orë më parë në altarin e Notre Dame. Aktiviteti i tij i fundit ishte përfshirja në lëvizjen kundër martesës së gay-ve. Shkrimtari e kishte lajmëruar më parë vetvrasjen e tij duke thënë se duhet një gjest për të shkundur ndërgjegjen njerëzore dhe shoqërinë civile e cila duhet të ndërhyjë për të ndaluar shkatërrimin e njerëzimit me lejimin e martesave gay në Francë.

Stuhia në Oklahoma, 91 numri i viktimave

redaksia — Tue, 21 May 2013 11:17:16 +0000

Së paku 91 njerëz kanë humbur jetën dhe shumë të tjerë janë plagosur dhe zhdukur, nga një stuhi e madhe me erëra të fuqshme, me shpejtësi deri në 320 milometra në orë, në shtetin Oklahoma në Shtetet e Bashkuara. Spiralja natyrore me gjerësi afro një kilometër, goditi shtetin mbrëmë. Stuhia shkatërroi çdo gjë, prej shtëpive e deri te veturat nëpër rrugë. Sipas Zyrës së kontrollit mjekësor në Oklahoma, në mesin e atyre që humbën jetën janë edhe 20 fëmijë. Presidenti amerikan, Barack Obama, ka shpallur gjendje të shkatërrimit madhor në rajon dhe ka urdhëruar autoritetet federale që të ndihmojnë në përpjekjet për ripëtritje.

Westerwelle për vizitë dyditore në Serbi dhe në Kosovë

redaksia — Tue, 21 May 2013 10:15:21 +0000

Ministri i Jashtëm Westerwelle dëshiron të këmbëngulë që Beogradi të tregohet i gatshëm për kompromis për Kosovën. Ministri i Jashtëm gjerman Guido Westerwelle (FDP) fillon sot pasdite një vizitë në Serbi dhe në Kosovë. Tema qendrore e vizitës, e cila do të zgjasë deri të hënën është marrëveshja ndërmjet Serbisë dhe Kosovës e arritur me ndërmjetësimin e BE-së për normalizimin e marrëdhënieve të mes tyre. Prej zbatimit të kësaj marrëveshjeje varet afrimi i të dy vendeve me BE-në. Ministri i Jashtëm Westerwelle dëshiron të këmbëngulë në Serbi që Beogradi të tregohet i gatshëm për kompromis për Kosovën. Por, para fillimit të vizitës së tij në Beograd presidenti serb Tomislav Nikolic e akuzoi qeverinë gjermane për “shantazh”. “Gjermania duhet të kuptojnë se çdo shantazh është i pavlefshëm. Ne nuk do të presim vetë venat për të bërë vetëvrasje “, tha Nikoliq të premten (17.05) në Beograd për stacionin televiziv Prva.
Zëvendëszëdhënësi i Ministrisë së Jashtme, Martin Shefer, tha se objektivi është që tani të sigurohet një plan konkret kohor për realizimin e marrëveshjes së normalizimit ndërmjet dy palëve, e cila u arrit një muaj më parë me ndërmjetësimin e BE-së. Serbët e Kosovës janë kundërshtojnë marrëveshjes së Brukselit. Edhe peshkopi ortodoks serb Amfilohije, i cili ka mjaft ndikim, shprehu rezistencën e tij. “Kjo nuk është marrëveshje, por është një diktim, është dhunë,” citohet ai nga mediat serbe. Peshkopi Amfilohije e paralajmëroi edhe Beogradin lidhur me afrimin me Brukselin: “E shkreta BE po shpërbëhet. Ta varësh ekzistencë prej anëtarësimit në një Fata Morganë si BE-ja, nuk është politikë reale.”

Lamtumirë mësues! Kurs gjuhësh të huaja përmes Skype

redaksia — Tue, 21 May 2013 10:11:54 +0000

Të mësosh një gjuhë të huaj me mësues privatë kushton shtrenjtë, por edhe të ndjekësh kurse është e vështirë për shkak të orareve. Glovico ofron mësim përmes Skype-it.
Në Mynih është ora 5 mbasdite. Ulrike Trüstedt është ulur para kompjuterit të saj në kuzhinë dhe po shikon ekranin. Atje shfaqet Julio Gomez nga Karakasi ku është ora 10 e paradites. Ai është ulur në një tavolinë para kompjuterit dhe është duke punuar. Gomez i jep mësime spanjishteje Ulrikes dhe tema e sotme është “Festat e Majit‘. I riu përpiqet të kuptojë Ulriken, kur ajo i shpjegon traditat bavareze në spanjisht. Ai më pas e pyet dhe e korrigjon. Julio Gomez punon për Glovico, një kompani e cila mundëson mësimin e gjuhëve të huaja përmes Skype-it. Klientët e kësaj kompanie kanë avantazhe sepse mësuesit janë nga vendet ku flitet gjuha që ata duan të mësojnë. Kjo ide i lindi hamburgasit Tobias Lorenz. “Rreth tre vjet më parë isha në Eritre për të punuar për temën e doktoraturës, ku kam studiuar sipërmarrjet sociale. Atje kam parë se si krijoheshin sipërmarrje të vogla në sektorin e ujit dhe arsimit. Kjo ishte një gjë që më bëri përshtypje duke parë situatën politike të Eritreas“, thotë ai.

Themelimi i kompanisë

Për shkak se Tobias Lorenz fliste shumë në Skype me miqtë dhe familjarët e tij në Gjermani, i lindi ideja të krijonte një sipërmarrje sociale që të krijonte lidhje përmes Skype me personat që nuk kishin kushte të mira ekonomike. Në një konferencë me temë „Financimi i sipërmarrjeve sociale“ në Shkollën e Lartë të Biznesit, Instituto de Estudios Superiores de la Empresa, në Spanjë ai u shpjegoi idenë e tij studentëve të interesuar, të cilët e ndihmuan më pas të krijonte një plan biznesi. Kërkesat më të mëdha tek kompania vijnë nga studentët dhe profesionistët e rinj, por nuk është i vogël edhe interesimi i të moshurave. Ulrike Trüstedt merr tre orë mësime dhe është e kënaqur. Vajza e saj ka të dashur një spanjoll, prandaj ajo kërkon të përmirësojë spanjishten. Për të Glovico është zgjidhja ideale sepse nëse do të kishte një mësues provat gjuhe në Mynih do të paguante nga 30 deri në 50 Euro në orë. “Modeli ynë i biznesit është shumë i thjeshtë. Për çdo orë në mbajmë një komision prej tre eurosh. Nga gjashtë deri në 700 orë bisedimi në muaj, mund të fitojmë rreth 2000 Euro, çka mjafton për mbajtur funksionale kompaninë.” – tregon Tobias Lorenz. Për Julio Gomez pesë Euro nuk është një shumë e madhe. “Për mua është e qartë se nuk është një shumë e konsiderueshme parash. Por mendoj se është më mirë të kesh pak të ardhura se asgjë. Kam kohë mjaftueshëm për të bërë diçka të tillë.”

Zgjerimi i kompanisë

Julio, i cili është mësues anglishteje dhe spanjishteje me studime univeristare, i lejon vetes të rrisi çmimin në 12 deri 15 euro për orë. Kjo mund të funksionojë thotë ai, por Glovico duhe të forcojë akoma më shumë pozitat në treg. Deri në fund të vitit orët e komunikimit do të rriten deri në 3 mijë. Gjithashtu Glovico ka si qëllim të rrisë bashkëpunimin me kompanitë të cilat duhet të dërgojnë punonjësit e tyre në vende të ndryshme. Me anë të Glovico-s këta punonjës do të kenë mundësi të dëgjojnë theksin e gjuhës së vendit ku do të shkojnë, por edhe do të krijojnë një kontakt, që mund t’i ndihmojë më pas në takimin e drejtpërdrejtë. Julio Gomez thotë se është bërë mik me disa nxënës të tij. Një çift nxënësish shkojnë rregullisht në Venezuelë dhe Gomez kujdeset për udhëtimin e tyre, në cilin hotel duhet të shkojnë, cilat vende do të vizitojnë dhe ku është me rrezik. Disa informacione janë mjaft të rëndësishme, veçanërisht në zona ku banorët nuk flasin gjuhë të huaja. Tobias Lorenz shikon një vend të veçantë për shkollën e tij.
“Ne ofrojmë më shumë se 35 gjuhë, duke nisur që nga më të mëdhatë si frëngjisht, spanjisht, anglisht, arabisht, kinezçe e deri tek ato më të voglat si tagalog e filipinçe, uolou e senegçe apo suaheli. Zemra jonë rreh më shumë për gjuhët e vogla, sepse ne ofrojmë një mundësi unike për t’i mësuar”, përfundon ai.

Kroaci, sot zhvillohen zgjedhjet lokale

redaksia — Sun, 19 May 2013 11:08:16 +0000

Në Kroaci zhvillohen sot zgjedhjet lokale, ku do të rinovohen 555 këshilla komunalë dhe 21 provincialë si edhe kryetarët e bashkive dhe provincave. Këto zgjedhje, që zhvillohen 40 ditë përpara se vendi të bëhet zyrtarisht anëtar i Bashkimit Evropian, janë një test tepër i rëndësishëm për qeverinë socialdemokrate të kryeministrit, Zoran Milanoviç, i cili nuk po mundëson ende ringjalljen ekonomike të vendit, i futur në recesion për të katërtin vit radhazi. Në Zagreb, favorit për fitimin e zgjedhjeve është kryetari aktual i bashkisë, Milan Bandiç, në pushtet që nga viti 2000, më parë si socialdemokrat dhe tani si i pavarur.

Qetësohet cikloni që rrezikonte Bangladeshin

redaksia — Sat, 18 May 2013 11:35:31 +0000

Cikloni që kërcënonte në masë të madhe Bangladeshin dhe Birmaninë, është qetësuar, pas vrasjes së 18 personave. Drejtori i Departamentit Meteorologjik në Bangladesh, Mohammad Shah Alam, ka thënë se stuhia Mahasan ka humbur fuqinë e saj, duke shkaktuar shira të dendur. Frika se Mahasan mund të shkaktojë përmbytje masive ka bërë që zyrtarët t’iu bëjnë thirrje mbi 1 milion njerëzve që të largohen nga zonat e rrezikuara bregdetare. Autoritetet po ashtu kanë pezulluar aktivitetet në portin e qytetit Çitagong – një qendër e transportit të madh tregtar – si dhe kanë anuluar fluturimet nga dhe në qytet.

Irak, 32 të vdekur nga dhuna

redaksia — Sat, 18 May 2013 11:01:23 +0000

Së paku, 32 njerëz kanë vdekur dhe dhjetëra janë plagosur në dy shpërthime jashtë një xhamie suite në Irak, pas dy ditë sulmesh në vend, që vranë dhjetëra njerëz të tjerë. Disa raporte thonë se një bombë ka shpërthyer derisa adhuruesit po largoheshin nga lutjet e së premtes në Bakuba, në afërsi të Bagdadit. Një bombë tjetër raportohet se ka shpërthyer pasi që njerëzit ishin mbledhur në vendin e ngjarjes. Të mërkurën dhe të enjten, një valë sulmesh që goditën shiitët në Bagdad, Kirkuk, Mosul dhe Tamiyah kanë vrarë më shumë se 50 njerëz.